لميس الحديدي تنتقد المسلسلات الشعبية: كلها ردح وزعيق

آخر تحديث: الجمعة 7 مارس 2025 - 5:37 م بتوقيت القاهرة

منة عصام

انتقدت الإعلامية لميس الحديدي المسلسلات الشعبية المعروضة في موسم رمضان هذا العام، وتعمدت وصفها بـ"العشوائية".

وقالت في منشور كتبته عبر صفحتها على فيسبوك: "المسلسلات الشعبية (العشوائية) اجتاحت الموسم الرمضاني هذا العام، وربما تكون من الأكثر نجاحا والأكثر مشاهدة، الممثلين هايلين ونجوم ومشاهد العنف متقنة وكل حاجة".

ولكنها تسائلت: "هو ليه كلها ردح وزعيق ولوي بوز وألفاظ عجيبة، وليه بيخلوا الممثلين يتكلموا كده؟ "التضجين" المط في الكلام.. دى العامية المصرية أحلى لهجة، ليه بنحولها لعشوائية ونمحو ملامحها".

واستمرت الحديدي في انتقادها بتوجيه نصيحة قائلة: "فيه فرق بين فن الواقع الذي كان يترأس مدرسته الأستاذ المخرج صلاح أبو سيف وبين اللى إحنا بنشوفه.. أكيد فيه طبعا فئات بتتكلم كده نتيجه انهيار التعليم واجتياح اقتصاد التيك توك اللي عاث في حاراتنا وعقولنا فسادا.. لكن إحنا ليه بنرسخ الأسوأ؟ بنعلم الأجيال اللي بتتفرج على المسلسلات دي إيه؟ واللي بيحبوا الفنانين دول ايه؟ يتكلموا بنفس الطريقة؟ الممثل الأشطر اللي بيطجن، والممثله الأفضل هي اللي بتلوى بوزها وتتشدق اللبانة؟".

ثم عادت وقالت في منشورها: "طبعا ده مش معناه إن النموذج الصح هو فن الكمباوندات لأن ده برضه لا يمثل المجتمع لكن فيه ناس عادية عايشين في مصر وهم الأكثر".

واختتمت منشورها بالقول "الفن تأثير، حذار من التأثير في الاتجاه الخاطئ، نجاح مسلسل لن يعوض الثمن اللي بندفعه لسنوات طويلة".

يذكر أن لميس الحديدي ليست الإعلامية الأولى التي توجه انتقادات لمسلسلات رمضان، ولكن سبقتها الإعلامية مفيدة شيحة التي وصفت أعمال هذا العام بـ"الانحطاط".