فيديو.. عمرو أديب يعرض مقاطع لتهور السائقين على الطرق: حرام عليكم.. هو في إيه يا مواطن؟!

آخر تحديث: الإثنين 7 يوليه 2025 - 10:50 ص بتوقيت القاهرة

هديل هلال

استنكر الإعلامي عمرو أديب، تصرفات بعض قائدي السيارات والتي تفاقم من أزمة الحوادث على الطرق، مشددًا على ضرورة الالتزام بالتعليمات الصادرة عن إدارة المرور ووزارة الداخلية.

وأضاف خلال تقديمه لبرنامج «الحكاية»، المذاع عبر فضائية «MBC مصر»، مساء الأحد: «الناس اللي طامسة اللوحات، الناس اللي بتعمل سباقات، الناس اللي مركبة حمولات فوق الحمولات، أنا بقالي أسبوع ماسك في رقبة الحكومة، ما تخلوني أكلم المواطن شوية».

وروى أن سيارتين كانتا تتسابقان على الطريق أثناء عودته من الأستوديو مساء أمس الأول، على طريق دهشور، مشيرًا إلى أن الأمر دفعه لركن سيارته على جانب الطريق؛ تفاديًا لوقوع حادث.

وأكمل: «إمبارح بالليل وأنا راجع عربيتين بيجروا ورا بعض في طريق دهشور، الناس كلها ركنت على جنب، أنا ركنت على جنب، وواحد فيهم بيبص لي كده خش معانا، ولا ليا دعوة ولا صالح، نبقى نروح أي تراك في مونت كارلو إن شاء الله، هي الطرق دي معمولة يا جماعة عشان نتسابق؟ الطريق ده مش مصمم للسباق ولا مصمم للجري، الطرق دي مصممة للتنمية والمدارس والتعليم والحياة، حرام عليكم، هو في إيه يا مواطن؟!».

واستعرض خلال الحلقة مقاطع فيديو متداولة تظهر تهور السائقين على الطرق السريعة، معقبًا: «اللي منزل المواسير ده شايف إزاي؟ بحق كل الكتب السماوية هذا الرجل كيف يرى الطريق، هل في حاجة كده؟! أنا عاوز الداخلية تضرب بيد من حديد».

ووصف ممارسات السائق بـ«الجريمة» التي تسبب في إزهاق المزيد من الأرواح، مختتمًا: «أول مرة أطلب إن الداخلية تضرب بيد من حديد، اللي بيحصل ده جريمة، أنت بتموت الناس.. أرجوكم الأمر جلل، إحنا هنلاقيها منين ولا منين».