مجدي الهواري يودع سكرتير مدرسة الناظر: لو عايز ختام حلو كن مثل سليمان عيد

آخر تحديث: الجمعة 18 أبريل 2025 - 10:18 م بتوقيت القاهرة

في منشور طويل عبر حسابه بموقع فيسبوك، ودع المنتج والمخرج مجدي الهواري الفنان سليمان عيد، أحد أبطال فيلمه "الناظر" الذي أنتجه عام 2000 وحقق نجاحا مدويا.

ونشر الهواري صورة لسليمان وهو يقف بجوار الراحلين علاء ولي الدين وحسن حسني أبطال الناظر، وصور من جنازته اليوم، وعلق: "رحل سكرتير المدرسة ورحل، الناظر عاشور، وصلاح، وسيد ضاهي، والأستاذ حسين، ومس انشراح، والأستاذ درديري !! الإدارة كلها، الله يرحمهم جميعاً، وفضلت المدرسة (الحياة) الذكرى الحلوة والأيام الحلوة والتفاصيل الحلوة والعمر بقى ورا مش قدام! حزن وقاهرة ووجع".

وتابع، "درس جديد من المدرسة بيعلمنا إن مفيش كبير مفيش أفيش ولا أسماء مين، ولا فين مكانها ولا أجرك كام ولا بتجيب كام، فيه آية ربنا عايز يقولنا فيها حاجة وهي ولا حاجة بتفيد، بس هو عملك المفيد، والتوحيد والتسبيح والعبادة والصلاة والصداقة تكون من قلبك لصحبك وروحك وطيبتك وأخلاقك، كله قاعدلك ويظهرك في يوم زي ده ما شاء الله زي الفل، وكله عندك يا سليمان ونشهد، ودعانا كلنا علشان نصلي يوم الجمعة مبروك عليه يومه، دعانا كلنا علشان نصلي عليه، علشان نفرح بيه ونفرح له ونشهد له أنه طيب وسليم وقلبه نضيف".

وأضاف، "أحلى ختمة وختام وخاتمة ربنا يكتبهنا كلنا، وساب رسالة قوية لينا كلنا، عبارة عن آية بتقول لو عايز يومك يبقى حلو كده، والناس كلها تصلي عليك، خليك كويس مع الناس طول عمرك، وده سليمان عيد، وأسلك وخليك في حالك، وده سليمان عيد، وسيرتك تبقى حلوة وميختلفش عليها اتنين في الخير.. وده سليمان عيد".

واستكمل، "نشهد كلنا بكده عمره مازعل حد حتى لو فكر يعتذر عن دور، وده أقل حقوقه، كان يخاف يزعل مننا حد".

وواصل: "الله يرحمك يا سليمان مصر كلها زعلانة عليك مش إحنا بس، دي علامة ياواد، افرح بقيت آية لينا كلنا، كان نفسك فيها يا ابني في حياتك تبقى في وسطينا مرة (قدام) خدتها يا سليمان وبقيت قدامنا كلنا الكبار والنجوم والصغيرين كله بقيت له آية، في أهم مشهد لينا كلنا أنت بطله، افرح يا عم صبرت ونولت يا ابني وبشدة، هنفتكرك طول الوقت وبشدة، غصب عننا وضحكت علينا كلنا وبشدة وفوزت بالجنة إن شاء الله وبشدة وجعلك الله لنا آية وبشدة، لن ننساك وبشدة، مع السلامة وبشدة، الله يرحمك وبشدة".