رد المخرج محمد سامي على تصريحات الفنان طارق لطفي التي أدلى في برنامج "حبر سري"، عن خلافه مع المخرج محمد سامي، بسبب طبيعة دوره في مسلسل "كلام على ورق"، والذي تم عرضه منذ ما يقرب من 11 عامًا تقريبًا.
وقال المخرج محمد سامي عبر حسابه الشخصي على موقع فيسبوك: "ردًا على كلام طارق لطفي المنتشر اليومين دول.. أولًا طارق ممثل محترم وإنسان جميل واشتغل معايا مرتين، مرة في مسلسل مع سبق الإصرار، ومرة تانية في مسلسل حكاية حياة، وأعتقد الدورين كانوا مهمين ومحترمين جدًا وحقق فيهم نجاح مهم، بعدها عرضت عليه دور في مسلسل كلام على ورق وحصل خلاف إنتاجي على الأجر تقريبًا، وعلى مساحة الدور، وعمل الدور ساعتها الراحل الجميل الأستاذ حسين الإمام والكلام ده سنة 2014 يعني من 11 سنة".
وأضاف سامي: "فوجئت إن طارق لطفي طالع دلوقتي بيقول إنه رفض يقدم الدور لأنه كان دور واحد شاذ جنسيًا، وبدأ يتكلم عن المجتمع والناس وخوفه على الجمهور وكلام غريب جدًا بحالة من المبالغة والاسترسال لكسب ود الجمهور واللعب على الحالة الدينية والمتحفظة عند الجمهور العربي، ولكن فاته حاجة مهمة إنه بيتكلم عن دور في عمل مصور وموجود والناس تقدر تتفرج عليه، والدور مش دور شاذ ولا ليه علاقة بالشواذ!".
وتابع سامي: "مش فاهم طارق قال كده ليه واخترع الموضوع ده إزاي وكمان عمل حكاية غريبة جدًا أنا مش فاهمها، وإنه خاف على عيلته وأسرته وطلعني بروَّج لشيء غريب جدا، أنا أول مرة وسط عرض عمل ليا أسمح لحد ياخدني لموضوع جانبي ولكن كان لازم أرد، لأن لو طارق عنده عيلة فأنا كذلك".
ووجه حديثه للفنان طارق لطفي: "ومع احترامي ليك يا طارق كلامك مختلق وغير صحيح، والدور موجود ينفع الناس تشوفه، وكان حسين الإمام رحمة الله عليه طالع بيحب روجينا، وهي حبيبة عُمره وأنتيمه ماجد المصري وأحمد زاهر وأشرف زكي".
وتحدث سامي عن الدور الذي عرضه على طارق لطفي: "كان جدع مايع وصاحب كباريه وده اللي كان عاجبك في الدور وعملت معايا بروڤة أداء عليه وعلى مياعته وكان عاجبك، راجع نفسك يا صديقي قبل إلقاء قنابل تزعل زميلك منك، ومعلش إني رديت بالشكل ده ولكن لا بد من الرد للتوثيق، كلامك كان لازم يترد عليه وكل سنة وأنت طيب وأسرتك الكريمة بخير.. ولو أنت ترفض تقديم دور الشاذ فأنا قبلك أرفض أخرجه!".