كشف الفنان طه دسوقي، موقفه من قافلة الصمود التي أثير حولها أقاويل كثيرة الأيام الماضية، والتي تضم عددًا كبيرًا من الجنسيات المختلفة بهدف كسر الحصار عن غزة.
وكتب "دسوقي"، عبر حسابه الرسمي على موقع "فيسبوك": "من بداية الأحداث والأمل في الإنسانية بدأ يقل لحد ما قرب يختفي، يمكن حركة سفينة مادلين واللي بيتبعها حركة قافلة الصمود، و march to Gazaهم الوحيدين اللي قدروا يرجعوا الأمل ده تاني لأنها حركة شعوب ولحظة إدراك يمكن أول مرة تحصل في العالم إن الشعوب هي اللي في إيدها الحل والقرار لو اتحدوا".
وأضاف: "لكن السؤال هو، هل هتفضل الدنيا وردي؟ وحركة الشعوب السلمية هتفضل سلمية ومش هيندس فيها ناس تخرب أو هيتم الاستيلاء عليها من أي جماعة أو حزب أو أي مسمى ليه مصالح غير المصلحة الواحدة؟ "حصلت قبل كده كتير".
وتابع: "من قلبي أتمنى ده يحصل وعشان كده أنا زي ما أنا متضامن مع الحركات الشعبية اللي هدفها بجد هو كسر الحصار على غزة، وكمان متضامن مع بلدي وحكومتي اللي واقع على عاتقها مسئولية كبيرة في تنظيم الحدث العالمي ده".
وأردف: "معلش يعني الدولة اللي بتستضيف كأس عالم بتعمل كل احتياطاتها الأمنية عشان تستضيف ناس رايحة تتفرج على ماتشات.. فما بالك باستضافة مسيرة عالمية هدفها كسر الحصار على بلد محتلة من عدو مجرم حرب".
وواصل: "فأتمنى إننا نسيب حكومتنا تنظم ده وتاخد كل احتياطاتها الأمنية لحماية الأرض وحماية أهلنا برضوا المقيمين في مدينة العريش من غير ضغط ولا مزايدة، وندعي يا رب السلام لغزة ولمصر ولكل الشعوب الحرة".