نشرت محافظة القاهرة منشورًا جديدًا عبر صفحتها الرسمية على موقع "فيسبوك"، ضمن سلسلة "حكاوي القاهرة" التي تسلط الضوء على تاريخ العاصمة العريق.

وبدأت المحافظة منشورها قائلة: "مقهى ريش بالقاهرة هو أكبر تجمع للمثقفين والسياسيين في المنطقة العربية.. بيقع قرب ميدان طلعت حرب وسط البنايات المصرية العريقة، واتبانت العمارة اللي فيها المقهى سنة 1908 على إيد عيلة اسمها (عادا)".

- من التأسيس حتى التحول لملتقى ثقافي

وأكملت المحافظة: "المقهى اتأسس على إيد رجل الأعمال النمساوي بيرنارد ستينبرج، وفي 26 أكتوبر 1914 باعه لرجل الأعمال الفرنسي هنري بير اللي سماه (ريش) عشان يبقى شبه أشهر مقاهي باريس اللي لسه موجودة لحد دلوقتي بنفس الاسم".

واستطردت: "اللي يزور مقهى ريش هيلاقي نفسه قدام تحفة معمارية.. الديكورات واللوحات اللي بتزين المكان هتبهرك، وكمان اللافتة اللي فوق الباب الرئيسي ليها طابع مختلف عن أي مقهى تاني في ميادين القاهرة اللي أنشأها إسماعيل باشا على غرار باريس".

- الملكية وتطور المكان

وأضافت المحافظة: "زي القاهرة كده.. موجود كمان في تونس والجزائر وكازابلانكا مقاهي اسمها (ريش)، شبهه بالظبط في الطراز والديكور والمكان".

وأوضحت: "قبل ما تخلص الحرب العالمية الأولى سنة 1918، اشترى التاجر اليوناني الشهير ميشيل بوليدس المقهى من صاحبه الفرنسي، وظل ملك لليونانيين لحد سنة 1960، بعدها انتقلت ملكيته لعبد الملاك خليل الصعيدي المصري.. ولسه في إيده لحد دلوقتي".

- ريش.. من القهوة إلى بيت الفن

وتابعت محافظة القاهرة في منشورها: "المقهى وقتها كان ممتد لحد ميدان سليمان باشا (طلعت حرب حاليًا).. وكان جنبه مسرح غنائي غني عليه عمالقة الطرب زي صالح عبد الحي وزكي مراد.. وكمان كان فيه صالة مصارعة ومكان للعب الطاولة".

وأضافت: "من وقتها بقى لمقهى ريش بُعد ثقافي.. ما بقاش مجرد قهوة.. بقى ملتقى الأرستقراطية والفنانين والمثقفين والأجانب.. وفي الأربعينات اجتمع فيه كل اللي بيشتغلوا في الموسيقى عشان يلاقوا حل لمشاكلهم، وكانت النتيجة إنشاء أول نقابة للموسيقيين في مصر والوطن العربي، وكان على رأسهم أم كلثوم ومحمد عبد الوهاب".

- ريش شاهد على التاريخ

واستكملت المحافظة: "مقهى ريش من جوه عامل زي ألبوم صور لتاريخ القاهرة.. هتلاقي صور الأهرامات، الفيضان، ميادين القاهرة زمان.. وكمان نجيب محفوظ كان بيعقد ندوته الثقافية كل جمعة هناك، والحوائط مليانة صور عمالقة زي طه حسين، يوسف إدريس، أم كلثوم، نجيب الريحاني، أحمد فؤاد نجم، يحيى حقي وغيرهم كتير.. وحتى أول حفلة لأم كلثوم كانت من جوه ريش وهي لابسة الثياب البدوية".

وأشارت المحافظة: "المقهى كمان كان شاهد على أحداث سياسية.. سنة 1919 كان مكان لكتابة المنشورات وتجمع الثوار.. وده أكدته المطبعة اللي اتعثرت جوه بدروم المقهى وقت الترميم بعد زلزال 1992".

- تراث حي لا يمس

واختتمت محافظة القاهرة منشورها بقولها: "ريش ماكانش مجرد مقهى.. كان جزء من وجدان القاهرة وتاريخها.. من أيام ما غنت فيه أم كلثوم وهي طفلة صغيرة مقابل 15 قرش للكرسي و10 قروش للدخول.. لحد ما بقى ملتقى الأدباء والسياسيين واللاجئين.. وحتى اليوم بيحمل في جدرانه حكاوي كتيرة عن العاصمة وأهلها".