علق الإعلامي عمرو أديب، على الفوز القاتل الذي حققه النادي الأهلي على نادي البنك الأهلي في بطولة الدوري ليقترب من حسم بطولة الدوري.
وقال خلال برنامجه «الحكاية» عبر شاشة «mbc مصر»، مساء السبت: «حسبي الله ونعم الوكيل.. حسبي الله ونعم الوكيل.. حسبي الله ونعم الوكيل .. أتحدى لو فيه أهلاوي كان متوقع إنه هيكسب البنك الأهلي».
وأضاف: «دقيقة زيادة فوق الوقت الضائع مش علشان الحكم عاوز لكن علشان الكون عاوز الأهلي يجيب جون.. الأهلي لم يكن يستحق الفوز على البنك الأهلي.. كانت بتفرج على الماتش وعاوز أقول العدالة تحققت لكن كالعادة شربناها سادة».
وتابع: «عاوز أعرف نادي واحد في العالم بيجرى معاه كده.. احسبوا الأهلي جاب كام جون فوق الدقيقة 90 وفوق الوقت الضايع.. فين العدل فين المساواة احسبوا الوقت اللي الحكم حسبوا زيادة.. حاجة تخليك ماتشجعش كرة تاني».
واعتبر أن الأهلي قدم مباراة سيئة لكن البنك الأهلي قدم مباراة عظيمة، معقبا: «الأهلي نادي عنده كل الحظ ده.. دي مش إرادة ولا عظمة ولا حاجة».
واستكمل: «الأهلي كسب بس علشان لازم ياخد الدوري.. محدش يقولي الأهلي كسب عادي أو كسب كورة.. ده سِحر.. ده عمل.. مفيش تفسير منطقي إن الأهلي يفوز على البنك الأهلي».
وفيما اعتبر أن الأهلي لا يستحق الفوز بالدوري، لكن تابع: «هذا الفريق يستحق إن الدوري يروح له والدنيا كلها تلف علشان هو يكسب».
وقال أديب: «احتمال أعمل محضر عند محمد بيه في قسم الهرم بسرقة الأهلي للدوري».
وتابع: «فوز الأهلي بالدوري جايز يكون فيه حكمة بالنسبة ليا.. لو كان الأهلي خسر كنت ممكن أعمل حادثة أو تجيلي جلطة من فرحتي بخسارته».
وحقق النادي الأهلي الفوز مساء اليوم السبت بنتيجة 2-1 أمام البنك الأهلي في الدوري.
وبهذه النتيجة، يصل الأهلي للنقطة 55 في صدارة جدول ترتيب الدوري المصري الممتاز بفارق نقطتين عن بيراميدز الذي فاز على بتروجيت بهدفين نظيفين، بينما توقف رصيد البنك الأهلي عند النقطة 37 في المركز الرابع.