شارك الإعلامي ورائد الأعمال الإماراتي أنس بوخش، عبر حسابه الرسمي على موقع التواصل «إنستجرام»، الاثنين، مقطع فيديو لحريق اندلع في سيارته، بينما كان عمّال في المكان يهرعرن لإطفاء الحريق.
وكتب تعليقًا على الفيديو: «ترددت إذا أنزل هالبوست أو لا. بعدين قلت ليش لا، خلني أنزله. السوشال ميديا ما لازم يكون بس عن اللحظات الحلوة، بس عن اللحظات اللي مب حلوة بعد؛ هاي هي الحياة».
وأضاف: «الحريقة اللي صارت كانت شي غريب وعشوائي. كنا مخلصين التصوير، وإحنا نودّع الضيوف، سمعت حد يقول: (فيه سيارة تحترق). الغريب إني حسّيت إنها سيارتي قبل حتى ما أشوف. مشيت بهدوء أطالع، وفعلاً كانت سيارتي».
وأكمل: «هاللحظات تخلّي الواحد يفكّر كيف نحن محظوظين. لو ما صار خلل تقني بالتسجيل وخلانا نتأخر، كنا بنكون داخل السيارة. ولو تأخرنا دقايق زيادة، بعد كنا بنكون فيها. الحمدلله صار وقتها ومكانها وبهالطريقة».
واختتم: «كان فيه عمّال يشتغلون، وعندهم طفايات حريق، واستعملنا أكثر من وحدة. لو صارت الحريقة وإحنا نسوق أو حتى لو صار عند البيت، الله يعلم شو كان بيصير. الحمدلله نحن بخير وآمنين. شكراً لكل شخص رسل لي، وآسف إذا ما رديت على البعض».